Tag: seisoene

Seisoene. Fisies is daar 4 seisoene elke jaar wat ons moet deur maak. Die moeilikste een van hul vier vir my is winter. Ek kry ALTYD koud. Die HEELTYD koud.

Hier waar ek in die kar sit en wag vir my kind se leesklas om klaar te maak KRY EK KOUD. Is ek spyt dat ek die gedagte wat vlietend sy opwagting gemaak het net so vinnig weer vergeet het.

Die gedagte? Om ‘n kombers saam te vat in die kar…..dit voel of die winter haar ysige vingers oral indruk waar dit nie welkom is nie en ‘n opening vind. So asof sy jou bekruip van jou tone af en enkels op dieselfde tyd en stelselmatig op beweeg na jou “shins” toe. Dit voel of sy beide my hande in ‘n stywe greep vas het want die wil net nooit warm word nie.

Winter is besig om die boksgeveg te wen. Die bome se blare is amper alles af. Als is vaal….sy het die oorhand begin kry oor Herfs want dit is haar tyd om nou te wen met ‘n paar uitklop houe.

Ek lees vroeër die week hoe iemand op Facebook iets kort en kragtig sit oor hoe sy winter sien. Sy sê winter is nie populêr nie, vaal, pronk nie, maar is opreg en dit kom daarop neer dat winter NODIG is. Dit laat my dink….

Ek besef dit lankal. Dat winter NODIG is. Ek sê gereeld vir Dora as ek en sy so kla oor die koue en nie antwoorde en oplossings het om warmer te word nie, “We need the cold weather Dora, we need it.”

Ek wonder net altyd hoekom ek die gelukkige wenner van ongelooflik koud kry is? Hoekom kry niemand anders so koud soos ek nie?? Iemand wat nie KOUD kry nie VERSTAAN net nie.

Maar soos wat my gedagtes dwaal oor winter en hoe koud ek kry en dat ek weet koue winters nodig is vir goeie somers met goeie oeste is dit asof die Here my gedagtes in ‘n ander rigting stuur….ons emosionele en geestelike seisoene.

Jy sien daar beleef en ervaar ons ook winter. DAAR is die winter vir my slegter as die fisiese winter. Met die fisiese winter kan ek nog ‘n kaggel laat brand en komberse oor my gooi en warm word.

Emosioneel is dit nie so maklik nie. Jy kan nie vir iemand VERDUIDELIK wat jy voel nie en wat jy besig is om deur te gaan nie. Hulle verstaan nie altyd nie. Sodra jy jou mond oop maak en dit hardop uiter dan maak dit nie sin nie.

Tog is hierdie winter tye emosioneel ook nodig. Want dis in hierdie tye wat die Here alles wat onnodig is, laat afval van die koue. Net dit wat belangrik is, oorleef.

Hoe mens emosionele winters oorleef is net God se genade. Alleen kan mens dit die doen nie. As jy terug kyk het jy nie ‘n antwoord of verduideliking van hoe jy deur dit gekom het nie. Jy is net deur hom. Skielik en op ‘n manier kom jy deur dit…..

Al wat ek wel weet is dat ek moet warm bly. Om warm te bly moet ek myself omring met Sy ligdraers. Want lig gee hitte. Opregte mense, mense wat jou verstaan, mense wat jou nie afbreek of misbruik nie. Mense wat, as hulle naby genoeg aan jou is, hul hitte kan laat straal om die ergste koue van jou af weg te hou. Om dit wat nodig is warm te hou en te laat oorleef.

Dis hoe ek emosionele winters oorleef – dit saam met God se genade en Sy woorde op watter manier ookal Hy my dit laat hoor….of dit nou musiek is of fisiese tyd in die bybel spandeer. Praat gaan Hy met my praat. Ek moet net HOOR wat Hy vir my wil sê.